【經驗之談】比錢落Facebook 廣告反被Ban之原因

我哋比錢落Facebook 廣告，小則擔心被Facebook Ban 廣告，影響廣告成效，更大擔心係被Facebook Ban晒成個廣告帳戶，連帶你個段時間落嘅ad 冇效… （咁大件事都唔notification, 反而run ad 又會通知你😑），比錢落Facebook 廣告反被Ban之原因有好多，但Facebook卻答得模稜兩可，佢唔會好Details話你知邊隻字邊個部份唔得，只係略略講原因，再叫你睇返Facebook 守則，小編們好多時都要好似偵探咁找錯處，估返邊個位出錯再改善…  以下呢幾項常見問題，亦係我之前嘅失敗經驗，你又有冇試過？

1) 肖像權

有時我哋會用咗啲名人相，可能係代言，又或者提及名人本身或報導，不過Facebook見到肖像相對敏感，例如之前我做過一啲慈善活動（如義賣唱片），咁張Visual 唱片梗係有歌星個樣架啦，但Facebook都Ban咗，話涉及肖像權，叫我哋交有關文件證明先可以出到Ad，之後我哋改為唔Show明星樣，淨影CD無樣Cover，最後順利過關。

2) 涉及歧視／負面字眼

Facebook嘅「歧視」對我哋一般人所講嘅「歧視」好唔同，特別敏感，可能係AI審查關係，佢哋好多時都無理解個意思就Ban咗先，覺得係帶有歧視或負面，如瘦身廣告唔可以寫「肥咗」，美白廣告唔可以寫「黑咗」，增髮廣告唔可以話「甩髮／脫髮」等等，有次我想寫「去完旅行肌膚黑咗…」，被Facebook Ban咗個Ad，而改咗「去完旅行肌膚變咗成舊炭」就OK （Creative的重要啊）… 

3) 裸露照片

賣瘦身產品，好多時都會搵啲少布嘅Model，讓人產生憧憬，但如果Model露出太多肌膚，Facebook都會Ban，試過相入面嘅Model 著3點式被Ban，解決方法可能係局部Show／縮細／加字喺Model身上等等去試。

4) 肉酸照片

曾經幫過一隻去死皮產品寫Feed，佢嘅賣點就係用完之後死皮會自動脫落，效果幾震撼，咁Visual方面就用「甩皮」做Selling Point，不過如果個張「甩皮相」甩得太多皮，又或者甩皮相片太大，Facebook都會評為肉酸被Ban Ad，解決方法就要幫佢執相，唔好甩咁多皮、相片縮細啲、執得美觀啲 （明明係產品真實效果都要減低個產品成效）… 

5)無故被Ban

尤其呢幾個月，Facebook 唔知點解會無原無故幫你Ban晒成個廣告帳戶（黑人問號），當你Request解鎖時佢哋又好快幫你攪掂返，但又唔會同你Say Sorry，身邊好多苦主出現，我試過一個月2次比佢鎖廣告帳戶，苦主可睇 Jansen 最近寫嘅Blog： https://bit.ly/3dNorwl 

–

以上係我喺ads manager 買Ad 嘅經驗，相反我用手機買IG Ad 暫時未有被Ban Ad嘅情況出現（太好了）！最後，Facebook Ban你原因有好多，好多字眼陷阱都要小心，有時要靠經驗累積判斷，祝大家順利出Ad，收到好成效！

思詩公主 插畫