【關於網紅／藝人／KOLs 社群營銷 二三事】
—————————————
1/ 網紅、藝人、KOLs簡單定義
網紅：可以係IG／FB／Youtuber等等社交媒體平台，只要Followers比較多，就可以稱上網絡紅人 （網紅）
藝人：出現喺電視／訪問，受市民所認知
KOLs（Key Opinion Leader）具個人專業範疇，有個人見解，並對該群體購買行為有較大影響力嘅人
喺香港，Marketers 搵佢哋合作主要係Brand Awareness，老實講，能夠帶到生意加埋回到本嘅係少之又少…
2/ 網紅、藝人、KOLs 收費如何？
要睇下搵佢合作做啲咩，相片？影片？Live？咩平台？再細分就係1張相定幾張相？拍片拍幾多分鐘？要拍啲咩？可唔可以加埋其他品牌一齊介紹等等，每一類都會有唔同嘅價，每個人定嘅價錢都好唔同，如果預啱佢哋嘅心水品牌更可能會減價，所以收費真係好海鮮價！由幾千一張相到幾十萬1條Live都有！
有啲出名網紅／藝人／KOLs ，仲有Exclusivity（某段時間唔可以接同類型廣告）同Royalty（買斷佢個Post For其他用途）等收費，而收費更要視乎日子長度。
【Live Streaming 準備二三事】
3/ 準備
當條件傾好，我哋呢啲小薯就要為佢準備Materials For出Post用。其他嘢唔講，今次主要講Live Streaming 。
通常網紅／藝人／KOLs 背後都會有個經理人／中介 接洽，你係好難直接接觸到佢，而喺無特定要求下，一般嚟講，通常佢哋拍Live都係夜晚屋企食完飯後做，因為呢段時間比較多人睇，亦可營造親切舒適嘅感覺，而我哋都比較少喺現場出現。亦有試過同啲老前輩合作，因為佢哋唔熟Live，所以我哋租咗個場地比佢扮屋企兼指導佢。正因為Live難控制，唯有事前做好本份：
A）主題
會同佢哋一齊訂下主題，例如先了解下佢最近去邊度旅行，拍咩劇，有咩攪作等等，從而諗下由咩角度入手去SoftSell 產品。
B）講稿
傾好主題後，我哋就會幫佢訂個框架／大鋼，大約講啲咩，而一啲繁忙嘅藝人，我哋亦會做埋Live模擬劇本比佢參考再自由發揮，亦會體貼間埋重點。（不過佢睇唔睇又係另一問題）
C）產品資料
為咗比佢哋了解更多產品資料，我哋會做埋Reseach簡單講下成份同功效。亦會喺事前送Product比佢試用一段時間
4/ 一般網紅／藝人 與 KOLs 之分別
A）專業認真
有啲網紅／藝人睇完以上啲資料就算，去到Live時爆肚，亂咁為品牌作嘢，甚至成個Live入面，全部只講自己嘢，而品牌只係輕輕提幾句… 亦試過有啲藝人忙於拍劇，做Live時對住劇本照稿讀，毫無專業。其實你收得咁多錢，就應該認真啲做好自己本份，如果唔係好難再有合作機會。
B）勤力
聰明嘅KOLs唔只睇我哋以上呢堆資料，更會背熟消化後，再從中融入自己嘅專業範疇加見解，包裝成自己嘅獨到分享。佢哋更會用心做成筆記.jpg，Live完後將筆記同Product一拼貼喺留言處，比Fans重溫。
C）與Fans互動
一條Live大約半小時，如果成個Live都係講產品有幾好用實在太假，所以聰明嘅KOLs就會講下自己嘅近況，亦都會同Fans互動，製造自然舒適嘅效果。而Live完後，佢哋亦會好識做喺Fans 啲Comments入面，回覆有關產品嘅疑問或同Fans說笑，做到好似朋友咁親切，Fans見到自己係「被選中嘅細路」，就會特別開心。
當做完Live後我哋會睇下個Live反應好唔好，而終極目標梗係想呢班網紅／藝人／KOLs 可以帶動到營業額明顯上升啦！如果遇到後者，我哋就會同佢傾多幾個合作，希望Mark住佢唔好比其他對手搶走咗。
不過一啲聰明嘅KOLs自知自己有帶貨能力，往往就會吊高嚟賣，啲條件更會令大家嚇一驚 （有機會再同大家分享 ：D ）
(2020年7月1日）
思詩公主 插畫
